Wyman 时装专栏的精彩文章分享 - 叻熱魔牙？(Less is More)

[陈永仁]

100個過氣時裝的妙用


「你啲舊衫去晒邊？」

沒錯，這是我最常遇到的常見問題，最 F的 FAQ。
稍為認識我的人都知道──邊度都冇去過！──它們大概就是我「惟有孽隨身」的「孽」，的確隨身，因為我幾乎沒有 get rid of我那些舊衫的能力或勇氣，惟有越搬越大。 95年我人生首次離家自住，那個「部屋」差少少夠 300呎。我最近一次搬屋是 05年，正在住的地方是我「 95部屋」× 10多少少的面積，如今又幾乎放滿了。而我試過生活在一床一桌的蚊型單位也沒問題，只要給我一張床和一張 A4紙大的枱面寫東西便足夠，所以現在這間屋在一張床和一張 A4紙以外多出來的空間，都是用來放衫的。
另一個熟朋友皆知的非秘密是，之所以身外（衣）物那麼越積越多，乃因我不肯賤讓二手衫，讓我曾經心愛的東西降格為一折貨，你知道 10,000元買件衫回來，結果要以 1,000元賣出，不代表會為它們找到懂得欣賞的好主人順便過度第二春，更似的下場是，新買家因為那件原價五位數的 Dior Homme jacket現在一千蚊「咁平」，便不懂珍惜，便「粗着」，當這件衫要皮幾嘢買回來時反而知道愛錫……我其實更寧願送給親朋戚友，因為「送」從來比「賣」高尚有型，只可惜和我身材相若已難搵，同時品味一致的睇怕渺茫過找到適合移植的骨髓。
於是……就變成我家咁樣！如今唯一能想到的解決方法是──令自己冇覺得咁 guilty！
最好是想出「 100個過氣時裝的妙用」，以解答那些好奇的塘邊鶴，和自己！
如果你的煩惱和我一樣，歡迎加入 brain storm！

如果 30年後開拍有關 10年代的電影，大概大膊頭都是走唔甩的指定戲服了吧？
Balmain SS09

Chanel SS Couture 10

人問：儲埋咁多舊衫有乜用？

何必再去 flea market呢？你同我屋企 store room咪 flea market囉！

我答：
1.幾年後引證自己的前衞──
Everything you like, I liked 5 years ago！

2.亦可……幾年後用嚟引自己笑──點解嗰陣居然會買件咁嘅嘢，仲懶靚咁着出街？

3.萬一有日家道中落（ touch wood先！），淨着呢批舊衫唔使買新嘅，都夠着下半世，分分鐘仲天天一款唔使 repeat㖭。

4.第日愛嚟開主題 party時，無論個 dress code係乜嘢年代乜嘢風格，都唔使頻撲出街搵，屋企大把貨，玩吓手 sponsor晒全個 party所有人都仲得……

5.買了新衫後，突然想起要配某件特別「了能」的配件才出色，例如一頂粉紅色羽毛帽或紫黃色 two tone wing tips鞋……有權搵勻全香港甚至全世界話冇就真係冇，偏偏你自己衣櫃入面就已經有。

自從有了「可以留畀個女第時用吖嘛」這個理由後，很多阿媽買貴衫貴袋便更爽手更無罪惡感了。所以各位姊妹想買多啲嘢，記得生。
Hermè s

6.將來要來開展覽會！（咩呀，你唔畀我下個月成名呀？你唔畀我出年做埋偉人呀？）

7.捐給大學、專上學院等教育機構。讀時裝的同學有時還是見過某些款式質地造工的實物比較好。

8.記錄自己的人生。噢，那年那月那日那場合，我穿過這個，那一年 22吋腰呢……

9.先讓它們遺失在衣櫃中，幾年後某件衫突然走番出來，便有地上執到寶的喜悅。就像在一件幾年沒穿的舊褸袋中發現 10封未拆的利是一樣 high！

10.傳給子子孫孫，因為你一直幻想「如果我阿媽有成個 collection嘅 Chanel jacket或者 Hermè s手袋傳授畀我就好嘞！」但佢冇，而你的女兒卻將會有！

我不信 2012世界會末日，但都以防萬一買定多啲衫以防冰河時期重臨囉！好偉大囉！
《 2012末日預言》劇照

11.人人都要用大量的時間和昂貴的價錢去搜羅 vintage衫，我卻不用舟車勞頓，家中儲物室已自備古董工場，像人人都尋找好味的醃菜，我家卻懂得自製 kimchi一樣自豪……
但講開又講，如果我已經擁有過去 30年的世界名師 vintage之選，為甚麼我每次去旅行時遇見精采的二手衫時仍然會忍不住手呢？

12.真的想不到其餘 88個 points了，世上與我同好/同病者請幫拖。
但臨尾，我還是有個絕招可出的。如果有人再以「成屋舊衫你想點？」來企圖制止我再置新裝的話，我會跟他說：「 2012年你咪嚟問我借衫着！世界末日可能好凍 o架！」

Text by黃偉文

[陈永仁]

叻熱魔牙？

區婉貞女士看着我揀衫。
我正在鏡前十五十六，不曉得黑西裝白恤衫打呔好還是打煲好？領口扣別針還是襟花？要不要再圍頸巾或戴條 chunky的項鏈？
區婉貞女士看不過眼：「邊有人襯衫襯到你咁成頭大汗 o架！好心你啦，熱辣辣，坐低飲杯水先啦！」
「唔得呀，我今晚謝師宴，最後機會呀，要着靚啲至得呀，嫲嫲！」係，區婉貞係我當時啱啱喺紐約坐完移民監返嚟嘅阿嫲，不過你咁聰明，我估你都一早估到啦。
區婉貞女士擰歪面，冇你咁好氣：「唉~叻熱魔牙呀，乖孫！」
「咩牙呀嫲嫲？」
「叻熱魔牙呀！咁都未聽過，仲話第日做時裝設計師！」
哦， Less is More！我明啦嫲嫲，不過我後來冇做到 fashion designer呀嫲嫲！
What is Less？
信不信由你，第一個教我這時裝「金句」的人的確是我阿嫲，但她的說服力也不比萬千自命品味專家強，所以 sorry，我不信甚麼是「 Less is More」，在我來說，它只等如「打乞嗤呀？梗係有人講緊你啦」或者「飲咗酒塊面紅好！發晒出嚟吖嘛！」一樣的人云亦云。
歪理被傳一千次之後，在我這兒沒有變真！
人各有志，我尊重 Less作為一種個人選擇，卻不認同它的貪心攞彩──居然連 More的功勞都想搶埋？而且，老老實實，也不能忽視 Less的偷懶嫌疑。
當然相信有人真心覺得「簡單骨子的 Celine與 Jil Sander就是最靚」，但也不得不抱持一吋的保留──一定有人只想「少做少錯」，便天天穿着白恤衫牛仔褲來魚目混珠，「匿」在 Less is More的擋箭牌之後，自以為從此立足不敗之地。對，你是不敗，但你也不會勝利，因為你都冇參加比賽！所以亦咪旨意「攞獎品」！
如果想贏「 Less is More」大獎，最快捷的方法是：請先證明給我看你連「 More」都一樣掂！陳奕迅唱歌唔震音是藝術決定，黃偉文唱歌震唔到音是天資所限為勢所迫！

Celine AW10

近年的大勢所趨卻是 less less less, fine！也很美，但別告訴我「… is More」！
Gucci AW10

What is More？

講起這個題目，又懷念起 McQueen來，他也是一個永不肯放棄 More的人。 Alexander McQueen AW10

講開 Eason，這位超級進化人有日問我：如何襯衫可以更好玩更進步？
我說：每次你襯好一套衫覺得 ready出街之際，試試加多一樣嘢才收手！一個襟章一隻手鈪一頂帽子一條圍巾一件甚麼都好，總之試試加多一個 item啦！
以為好易嗎？在時裝上「減」從來比較安全，那條頸鏈出現在這件恤衫之上不對勁？拿走！軍綠色套裝加螢光黃皮帶有點怪怪的？換回同色的 tone on tone吧！你看 Less就是那麼方便保險冇死錯人。
但明明襯好一身裝扮了，也即是所謂的「夠」了，還要 More多一個東西，那個東西又要襯 top又要襯褲，還要襯鞋子、包包、皮帶……
你想想也知多了一個「點」之後，彼此之間的「線」多了幾多？要考慮的「相生」與「相剋」多了幾多？所以視 More為「襯衫學」的進階訓練其實是相當好玩的。如果再加多一件呢？難度便又幾何級數地增加了。
所以我永遠留一份加大碼的尊重予 John Galliano, Christian Lacroix等崇尚「加完又加看看能加到甚麼地步仍不爆煲仍能和諧順眼」的大師們。

Less is not More

人生是要有時 Less有時 More才好玩的，其中一個最深明此理的人，叫 Miuccia Prada。 Prada AW10

所以 Less和 More根本就是兩種不同的武功。我實不明白為甚麼 90%以上的人類都盲目吹捧簡約才是 good taste，結構一複雜的組合就一棍打落聖誕樹叢永不超生。所以我常說「 Good taste is boring」，如果一味減減減減，減淨一個半個 detail就叫做 good taste的話。
依我看來，要 More得來「和平共存」甚至「相得益彰」所牽涉的勇氣和功力才難能可貴呢！
又有沒有人想過，「 Less is More」其實並非適用於世上萬事萬物呢？電影和小說的點到即止可以引起無限遐想，繪畫雕塑的留白或能增加張力或能突出重點，但你永不能裝碗白飯滴兩滴豉油就叫人幻想沒有放上去的叉燒油雞的味道，還說是 Less is More？也不能着件白 T恤就自以為一定比左青龍右白虎的金縷玉衣高明還笑人家不懂甚麼叫 elegant吧？
再講一次， Less和 More是兩套不同的武功。
Less is Less，
Less is OK，
but Less is not More！

Text by黃偉文